უკრაინაზე რუსეთის თავდასხმა გრძელდება
რუსეთი უკრაინაზე მორიგ მასიურ თავდასხმას ახორციელებს. უკრაინის მთელ ტერიტორიაზე საჰაერო განგაშია გამოცხადებული, კიევის მაცხოვრებლები მეტროსადგურებს აფარებენ თავს. რუსეთის თავდაცვის სამინისტრო აცხადებს, რომ მათი სამიზნეები უკრაინის რეგიონებში არსებული ენერგო და ინფრასტრუქტურული ობიექტებია.
უკრაინის პრეზიდენტის, ვოლოდიმირ ზელენსკის განცხადებით, უკრაინა რუსეთის სარაკეტო თავდასხმაზე პასუხს ამზადებს. მან ასევე აღნიშნა, რომ მიიღეს რამდენიმე მნიშვნელოვანი გადაწყვეტილება უკრაინის ენერგეტიკული ობიექტების რუსეთის თავდასხმებისგან დასაცავად.
უკრაინის შეიარაღებული ძალების მეთაურის ინფორმაციით, რუსებმა უკრაინას სხვადასხვა ტიპის 10 რაკეტით და 81 დრონით შეუტიეს, საიდანაც უკრაინელმა სამხედროებმა 5 ფრთოსანი რაკეტა და 60 დრონი გაანადგურეს.
ევროკავშირის უმაღლესი წარმომადგენელი, ჟოზეფ ბორელი აცხადებს, რომ უკრაინას ახლა საჰაერო თავდაცვა სჭირდება და ის ამ საკითხს ევროკავშირის საგარეო საქმეთა მინისტრების არაფორმალურ შეხვედრაზე განიხილავს.
უკრაინის პრეზიდენტის ინფორმაციით, რუსეთის მორიგი მასიური დარტყმის შედეგად 4 ადამიანი დაიღუპა და 16 დაშავდა. ზელენსკის თქმით, კაცობრიობის წინააღმდეგ ჩადენილი დანაშაულის დაუსჯელად დატოვება არ შეიძლება.
წყაროები: on.ge on.ge on.ge on.ge on.ge
ანტიკორუფციული ბიუროს გადაწყვეტილებები
ანტიკორუფციული ბიურო აცხადებს, რომ ოპოზიციური პარტიები დაფინანსებას სრულად ან ნაწილობრივ არ ასაჯაროებენ, რაც საფრთხეა სამართლიანი საარჩევნო პროცესისთვის. ბიუროს ხელმძღვანელმა, რაჟდენ კუპრაშვილმა ამ თემას ბრიფინგი მიუძღვნა.
ანტიკორუფციული ბიუროს ხელმძღვანელმა აქცენტი გააკეთა პოლიტიკურ მოძრაობა "თავისუფლების მოედანზე", რომლის ხელმძღვანელიც ლევან ცუცქირიძეა. კუპრაშვილის თქმით, ორგანიზაცია "თავისუფლების მოედანმა" ღიად გააკეთა პოლიტიკური გზავნილები, ამიტომაც, ანტიკორუფციულმა ბიურომ ორგანიზაციის თავმჯდომარე ლევან ცუცქირიძესა და ორგანიზაციის 24 წევრს ფინანსური გამჭვირვალობის უზრუნველყოფა დაავალა.
კუპრაშვილის განცხადებით, მოძრაობა "თავისუფლების მოედანს", ორგანიზაცია "აღმოსავლეთ ევროპის ცენტრს" მრავალპარტიული დემოკრატიისთვის, ამ ორგანიზაციის თავმჯდომარე ლევან ცუცქირიძეს და მოძრაობის 24 წევრს დაევალათ ფინანსური გამჭვირვალობის უზრუნველყოფა, რაც ნიშნავს, რომ ისინი ვალდებულნი არიან ანტიკორუფციულ ბიუროს წარუდგინონ ფინანსური ანგარიშები.
Comments